Сўнгги йилларда ёшлар орасида бел чурраси (грижа) ҳолатлари кескин кўпайиб бораётганини кузатмоқдамиз. Илгари асосан ўрта ва кекса ёшдагиларда учрайдиган бу касаллик, эндиликда ёшлар учун ҳам жиддий муаммога айланмоқда.
Нима учун ёшларда бел чурраси кўпайди? Мутахассис сифатида шуни таъкидламоқчиманки, бунга асосий сабаблар — ҳаракатсиз ҳаёт тарзи, нотўғри овқатланиш, ортиқча вазн ва узоқ вақт экран (телефон/компьютер) қаршисида ўтириб қолишдир.
Ҳаракат — умуртқа поғонаси учун ҳаёт демакдир Ёшлар бугунги кунда вақтларининг асосий қисмини ўтирган ҳолда ўтказишмоқда. Ваҳоланки, умуртқа поғонаси ҳаракатланиш учун яратилган. Узоқ вақт ўтириб ишлаш ёки дарс қилиш бел ва қорин мушакларини бўшаштиради. Мушаклар кучсизланса, умуртқа дискларига тушадиган юк ортади ва чурра ривожланиш хавфи ошади.
Ортиқча вазн — белнинг «душмани» «Фаст-фоод» ва нотўғри овқатланиш натижасида вазн ортиши белга механик юкни оширади. Бу эса умуртқанинг муддатидан олдин эскириши ва ейилишига олиб келади.
Ҳар қандай оғриқ ҳам грижа эмас Бел оғриғини сезган ҳар бир инсон «менда грижа бор» деб ўйламаслиги керак. Аммо, агар оғриқ оёғингизга ўтса, увишиш, каринcаланиш ёки кучсизлик сезсангиз, албатта, шифокор кўригидан ўтишингиз шарт.
Ёшларда даволаш имконияти юқори Юракларингизни хотиржам қилмоқчиман: бел чурраси аниқланган тақдирда ҳам, ҳар доим операция қилиш шарт эмас. Айниқса ёшларда тўқималарнинг тикланиш қобилияти юқори бўлгани учун даволаш жараёни анча самарали кечади.
Биз кўпинча қуйидаги усуллардан фойдаланиб, операциясиз жуда яхши натижаларга эришамиз:
• Физиотерапия ва реабилитация;
• Бемор учун махсус ишлаб чиқилган жисмоний машқлар;
• Мануал терапия;
• Нейротерапия ва Пролотерапия;
• Роботик лазер усуллари.
Кўпгина беморларимиз жарроҳликсиз ўзларининг кундалик ҳаётларига қайтишмоқда.
Келажагингизни ҳозирданоқ асранг! Келажакда соғлом бўлиш учун ёшликдан тўғри одатларни шакллантиринг: мунтазам машқ қилинг, идеал вазнингизни сақланг, бир ҳолатда узоқ ўтирманг ва доимий ҳаракатда бўлинг. Ёшликда қилинган кичик ҳаракатлар келажакда умуртқангизнинг соғлом қолишини таъминлайди.
Файзуллахон Нематуллаевич Шукуров Умуртқа жарроҳи (вертебролог)
